Psa 42 | TUCO | STEP | Mbouŋ to yes Kora Maaron, you naghaze le naneep nagharau ghom, ghoro poia. Eemoghon aazne, naneep saguan payom. Tovenen naŋazuuv ghom nanimale ŋgai sagsag to muruni, ve ikalkaal a ya pa ghunuuŋ.

aMbo 63:1, 119:131, 143:6

cMbo 100:2+

Psalms 42

Suŋuuŋ to ŋgeu to iŋazuuv Maaron ve rumai toni

Mbouŋ to yes Kora

1 Maaron, you naghaze le naneep nagharau ghom, ghoro poia. Eemoghon aazne, naneep saguan payom.
Tovenen naŋazuuv ghom nanimale ŋgai sagsag to muruni, ve ikalkaal a ya pa ghunuuŋ. ^a

2 Yoova, yom Maaron to uneep matam iyaryaar.
You lolog payom kat nanimale tamtoghon to murun matini, ve ikalkaal a ya pa ghunuuŋ.
Pale ŋeez o nalat peria tiom muul, ve nayoon ila naghom ve nasuŋ payom? ^{▼▼(42:2) Ŋgeu to itoor mbouŋ tonene ighaze le imuul ila Yerusalem ve isuŋ pa Maaron ila Rumai Tiina lolo.}

3 Mboŋmaagh ila le rabrab izi, tamtoghon tinoknok velegiiŋ ghou tighaze: “Maaron tiom ineep sine?”
Saveeŋ todi tonowen igham ghou nataŋtaŋ ve naghunghun matag suru irau mboŋ ve ndag.
4 You matag iŋgal imuul ila pa ŋgar to muuŋ naghamghami, tauto navotia lolog ila to Yoova.
Sawa tonenen, you namuŋmuuŋ pa ival tiina, ve yeiŋa nizazala pa Maaron rumai toni, leso nilup ghei pa suŋuuŋ.
Yei nimboumbou toman lolomai poia kat, ve nilolool ve nipapait Maaron iza pa poia toni. ^c
5 Tauto naghason taug naghaze vena to aazne lolog isami?
Lolog ipataŋan, ve nagham ŋgar naol pasa?
You irau naghur ila to Maaron, ve naghur matag pani.
Pasa, ye Maaron tiou ve Volaaŋa tiou. Tovenen you pale napaiti muul.
6 Onoon, aazne lolog ipataŋan kat, ve naŋazuuv ghom.
Pasa, naneep nagharau ghom maau.
You naneep izi ya Yordan daba to ineep izi lolooz Ermon dige to ila pa lolooz Mizar we.
Eemoghon you pale matag iŋgal imuul ila pa ŋgar tiom.

7 Pataŋani to yom upuli ivot payou, nene itatan ghou kat.
Nene inimale ya to ireer toman avolutu tiina, iyatovtova izala poghog ve imbeluut ghou.
Ve inimale dibom tintina to mazovan tipolpol izala poghog.
8 Eemoghon ndag to naol ne, Yoova lolo ineep tuŋia inim tiou ve iuluul ghou.
Tovenen mboŋ to naol, you namboumbou ve napaiti.
Suŋuuŋ tiou iŋaŋarua Maaron. Pasa, ye to iŋgin nepooŋ tiou.
9 Maaron, ye Volaaŋa tiou ariaŋa. Ye iponpoon ghou inimale raŋ to izala kat.
Tovenen naghasoni naghaze: “Pughu vena to lolom imaagh payou?
Vena to upul koiagŋa titatan ghou, ve tigham ghou lolog isami?”

10 Moghon moghon koiagŋa tisasavia saveeŋ velegiiŋ payou.
Ve tinoknok ghasoniiŋ ghou tighaze: “Maaron tiom ineep sine?”
Saveeŋ todi tonowen iŋgalŋgal ghou inimale iiz.
11 Tauto naghason taug naghaze pughu vena to lolog isami?
Lolog ipataŋan ve nagham ŋgar naol pasa?
You irau naghur ila to Maaron ariaŋa ve naghur matag pani.
Pasa, ye Maaron tiou ve Volaaŋa tiou. Tovenen you pale napaiti muul.